A Asociación Galega de Editoras participa nas xornadas profesionais da Feira do Libro de Bos Aires do 23 ao 27 de abril
- O 17/04/2019
- Dúas editoras terán presenza activa na feira internacional do libro de Bos Aires cun programa de actividades no stand da Xunta de Galicia, no Instituto Argentino-Gallego Santiago Apóstol, na Federación de asociacións galegas e no Centro Betanzos da cidade bonaerense.
- Unha selección de obras de Embora Edicións, Oqueleo, Editorial Galaxia, Edicións Xerais de Galicia, Baía Edicións, Alvarellos Editora, Kalandraka Editora e Hércules de Ediciones apoiarán a presenza da autoría galega convidada á feira: Antonio García Teijeiro, Luísa Martínez Lorenzo, Marcelino Agís Villaverde.
Santiago de Compostela, 17 de abril de 2019.- A vindeira semana, a Asociación Galega de Editoras participará nas xornadas profesionais da Feira do Libro de Bos Aires, do 23 ao 27 de abril. O gremio estará representado por dúas editoras, Alvarellos e Hércules de Ediciones, acompañadas pola secretaria técnica do gremio. Formarán parte da delegación galega, xunto coa autoría con presenza na feira, Antonio García Teijeiro, Luisa Martínez Lorenzo, Marcelino Agís Villaverde, convidada pola Dirección Xeral de Políticas Culturais (Consellería de Cultura e Turismo).
A axenda de actividades e o traballo comercial das editoras na propia feira completarase con outras no marco do Instituto Argentino-gallego Santiago Apóstol, no Centro Galicia, na Federación de Asociacións Galegas da Arxentina e no Centro Betanzos. O martes 23 de abril, ás 19:00h., abrirase a axenda das editoras galegas coa conferencia de Henrique Alvarellos Libros en movemento, no Centro Galicia de Bos Aires.
O mércores 24 de abril, ás 10:00h., o vicepresidente da Asociación Galega de Editoras, Henrique Alvarellos, acompañado da secretaria técnica do gremio, manterán un encontro co alumnado do Instituto Argentino-Gallego Santiago Apostol, baixo o lema O libro. Un tesouro de palabras.
Ese mesmo día, ás 19:00h., Henrique Alvarellos, Mirta Mato e a Agrupación Federico García Lorca de Bos Aires, celebrarán a conferencia Federico García Lorca: un poeta galego en Bos Aires e a continuación, a presentación de El gran viaje de estudios de García Lorca e de Seis poemas gallegos (Alvarellos Editora) no Centro Betanzos.
O xoves 25 de abril, de 20:30h. ás 22:00h., Laura Rodríguez (de Hércules de Ediciones) e Henrique Alvarellos (de Alvarellos Editora), xunto coa autoría galega, ofrecerán a mesa redonda Escribir y editar en Galicia: el valor de la resistencia, na Sala Alejandra Pizarnik, no pavillón amarelo da feira.
O venres 26, ás 19:00h., Alvarellos Editora continúa coas súas actividades cun acto de presentación da obra Memorias dun loitador antifranquista e un recital de Cartas de un condenado a muerte, coa intervención do editor Henrique Alvarellos, acompañado por Ruy Farías, Anahí Almansía, Mariela Sánchez e Ana Paula Mejuto, na Federación de Asociaciones Gallegas de la República Argentina.
Pola súa parte, ese mesmo día, a editorial Hércules de Ediciones, celebrará senllas presentacións no marco da Feira do Libro de Bos Aires. De 18:00h. a 18:45h., terá lugar a presentación do álbum ilustrado Morriña, con Paula Ventimiglia (autora), Laura Rodríguez (editora de Hércules) e Mónica Weiss (ilustradora). Ás 19:00h., Hércules de Ediciones presentará no stand de Galicia La historia de la filosofía como nunca te la habían contado, coa presenza do autor da obra, Marcelino Agís Villaverde, da editora de Hércules, Laura Rodríguez e do actor, Alfonso Burgos.
A Editorial Galaxia contará tamén cunha presentación: o libro Puf!. Vaia peido a cargo da autora e divulgadora científica presente na feira, Luísa Martínez Lorenzo, o sábado 27 de abril, ás 18:30h., no stand de Galicia.