O edición número doce do Simposio O libro e a lectura, abordará o futuro das feiras do libro, uns eventos tradicionais que foron e segen a ser espazos de encontro do público co sector do libro.

No século XV, coa implosión da imprenta, comeza a desenvolverse unha pequena industria do papel que aproveitando a innovación que supón a posibilidade de facer multitude copias dos textos, comeza a distribuilas. Os impresores e libreiros estarán presentes nas grandes feiras onde se ofrece á poboación todo tipo de mercadorías, dende produtos alimenticios a teas e peles da máis diversa procedencia.

Os mercados máis importantes de Europa onde os libros comezan a ter presenza son os de Lyón, en Francia; Medina del Campo, en España; Frankfurt, en Alemaña e Leipzig, tamén en Alemaña. Paralelamente aos progresos e ás innovacións da imprenta, comeza tamén o pulo da comercialización deses novos produtos do papel e dos contidos que se estende xa por toda Europa.

O século XX é o da consolidación dos modelos de feiras do libro tal como hoxe os coñecemos, coas súas dúas vertentes, a a das feiras onde os profesionais de todo o sector do libro negocian cos seus colegas a compra venda de dereitos ou do libro físico e as populares feiras de venda directa aos públicos.

Os cambios e as innovacións que vive a industria e a distribución do libro convidaron xa a algunhas organizacións a deseñar novos modelos, propostas que pasan pola asunción da existencia dunha gran heteroxeneidade de públicos e tamén da incorporación doutras industrais, novos elos na cadea de valor do libro.

A edición número doce do XII Simposio celebrarase o 12 de novembro no auditorio do Consello da Cultura Galega, en Santiago.