Xosé Ballesteros é reelixido presidente da Asociación Galega de Editoras
- O 22/05/2018
Xosé Ballesteros é reelixido presidente da Asociación Galega de Editoras
- O director de Kalandraka renova o seu cargo por dous anos máis.
- A promoción exterior e o diálogo con outros gremios do sector, prioridades do presidente da AGE.
Santiago de Compostela, 22 de maio de 2018. A Asociación Galega de Editoras (AGE), reunida onte en Asemblea Xeral Extraordinaria, renovou os cargos da súa Xunta Directiva para os dous próximos anos e decidiu por unanimidade reelixir como presidente a Xosé Ballesteros Rei, director de Kalandraka Editora, nunha aposta da Asociación pola consolidación e continuidade na liña de traballo desenvolvida nestes dous últimos anos.
O equipo directivo queda tamén configurado polo vicepresidente, Henrique Alvarellos Casas (Alvarellos Editora); a secretaria, María Xesús Gómez (Rodeira); a tesoureira, Ana Guerra Cañizo (Edicións Obradoiro) e catro vogais: Andrea Jamardo (Urco Editora), Miguel Toval (Edicións Embora), Francisco Alonso (Edicións Xerais de Galicia) e Xulio Amigo (Editorial Galaxia).
Promoción exterior e formación
O presidente da AGE, Xosé Ballesteros, fixo balance da xestión realizada durante os estes dous anos. Destacou o traballo realizado polas persoas que formaron parte da directiva e que agora non continuarán e valorou así mesmo a complicidade do equipo e do grupo de editoras que participan activamente a prol do funcionamento da Asociación.
Ballesteros lembrou que a parte máis gratificante foi sacar adiante á AGE despois dunha situación económica delicada e grazas a unha política de austeridade e de xestión, o que nos permite agora iniciar este período con certa solvencia. Nesta etapa a Asociación poderá investir en formación (sobre todo para os proxectos editoriais máis novos), na proxección exterior do libro galego, e continuar coa colaboración cos outros gremios e colectivos do sector.
