Santiago de Compostela, 21 de xullo de 2020.- O número de lectoras e lectores frecuentes, que len polo menos semanalmente, incrementouse en sete puntos porcentuais durante o confinamento ata acadar o 57%. Así se desprende do estudo ‘El papel del libro y de la lectura durante el periodo de confinamiento pro Covid-19 en España’, elaborado para a Federación de Gremios de Editores de España (FGEE) pola empresa Conecta Research & Consulting, co patrocinio do Centro Español de Derechos Reprográficos, (CEDRO). Este estudo completa e amplía o elaborado nas primeiras semanas de confinamento que xa reflectía un incremento de catro puntos na porcentaxe de lectoras e lectores frecuentes. Este estudo toma como referencia o Barómetro de Hábitos de Lectura e Compra de Libros 2019, presentado en febreiro de 2020, para facer a comparativa.

A lectura no confinamento

A lectura foi unha actividade que axudou a levar mellor o confinamento ao 82% das lectoras e dos lectores. O 50%, ademais, considera que lle axudou moito.
O 74% destaca que durante o confinamento gozou moito ao ler libros, un 70% considera que lle axudou a desconectar e un 65% atopou na lectura unha forma para combater o aburrimento.
De feito, o 99% sinala que os libros lle proporcionaron entretemento; desconexión (97%), relaxación (93%) e tranquilidade (90%) durante o confinamento.
En canto ao soporte preferido para a lectura, segue a ser o libro en papel máis ca o libro dixital. Un 83% leu neste formato, un 38% por cento fíxoo en formato dixital.
Entre as lectoras e os lectores dixitais obsérvase un incremento no uso dos e-reader como soporte de lectura e un menor uso do ordenador.

A lectura en menores e os libros educativos

Para máis do 70 por cento das lectoras e lectores de menos de 14 anos ler libros  axudóulles a levar mellor o confinamento. Ao 88% dos de menos de 6 anos léuselle neste período, e un 77% dos lectores e das lectoras de entre 7 e 13 anos tiveron á lectura como unha forma para distraerse, desconectar das pantallas ou evadirse da situación.

Dos datos recollidos tírase que unha de cada dúas persoas entrevistadas que empregou o libro de texto durante estas semanas para continuar cos procesos de ensino valora o seu uso como moi positivo.

Máis información na Nota prensa da Federación de Gremios de Editores de España

Descarga o estudo completo  aquí