• Segundo o “Barómetro de Hábitos de Lectura y Compra de Libros 2018” da Federación de Gremios de Editores de España, só un 4% das persoas enquisadas afirma preferir ler na nosa lingua.

• As editoras galegas demandamos, unha vez máis, políticas efectivas de fomento da lectura e do libro en galego.

Santiago de Compostela, a 24 de xaneiro de 2019.- Os datos coñecidos esta semana do “Barómetro de Hábitos de Lectura y Compra de Libros 2018” da Federación de Gremios de Editores de España revelan un lixeiro incremento xeral, en todo o Estado, das persoas lectoras, pero poñen de manifesto, a un tempo, a delicadísima situación da lectura en galego no noso país.

Para a AGE, que medre o número de lectores e, sobre todo, lectoras, en todo o Estado é unha boa nova, pero a situación en Galicia segue a ser moi preocupante. Non só por seguirmos na zona baixa da estatística a nivel estatal , senón sobre todo por ese ínfimo 4% de persoas que afirma escoller libremente o galego como lingua de lectura.

Demandamos, unha vez máis, políticas efectivas, reais e transversais de fomento da lectura en galego. A nosa lingua é un patrimonio único que debe ser preservado e potenciado de maneira decidida. Conéctanos co mundo, porque nos fai singulares e vivos, e debe ser prestixiada.

Accede a Barómetro completo

Accede á infografía