Os Premios Nacionais Marilar Aleixandre e Ismael Ramos súmanse á campaña promocional da Asociación Galega de Editoras
- O 27/11/2023
- No ano da conmemoración do 40 aniversario da Asociación Galega de Editoras seguimos a multiplicar os Premios Nacionais do sistema literario galego ao noso audiovisual ˂˂Unha edición poderosa ˃˃
- Marilar Aleixandre e Ismael Ramos protagonizan a nova pílula producida por Illa Bufarda e novo material coas premiadas máis recentes -Yolanda Castaño e Paula Carballeira- irase sumando a este en 2024
- O novo material audiovisual promoverao a AGE na FIL Guadalajara do vindeiro ano que contará con España como Convidada de Honra
Santiago de Compostela, 27 de novembro de 2023.- No ano da conmemoración do 40 aniversario da Asociación Galega de Editoras seguimos a multiplicar os Premios Nacionais -outorgados polo MCU-, cunha pílula audiovisual producida por Illa Bufarda, con Marilar Aleixandre e Ismael Ramos como protagonistas e aos que se sumarán con novo material en 2024 as premiadas máis recentes do noso sistema literario galego: Yolanda Castaño e Paula Carballeira.
˂˂Sumamos letras na cadencia dos versos, derivamos historias en viaxes de libros. Do índice aos confíns do mundo. Seguimos a multiplicar a excelencia dunha literatura de premio —afirman Marilar Aleixandre e Ismael Ramos no audiovisual– Unha edición poderosa ˃˃
Marilar Aleixandre foi recoñecida co Premio Nacional de Narrativa 2022 por As malas mulleres (Galaxia) e Ismael Ramos co Premio Nacional de “Poesía Joven Miguel Hernández” 2022 por Lixeiro (Xerais).
«Unha edición poderosa» , o lema do vídeo promocional que a Asociación Galega de Editoras preparara para a Feira Internacional do Libro de Frankfurt 2022. O novo material audiovisual tamén será promovido pola AGE na FIL Guadalajara (México) en 2024, que contará con España como Convidada de Honra
Actividade subvencionada pola Deputación da Coruña e a colaboración de CEDRO