A ASOCIACIÓN GALEGA DE EDITORAS INICIA EN BOLOÑA A SÚA PARTICIPACIÓN EN FEIRAS INTERNACIONAIS, DE NOVO SEN O APOIO DA XUNTA DE GALICIA
- O 25/01/2024
- A comezos de abril, nove editoras estarán presentes, cun espazo propio da AGE, na Feira Internacional de Boloña (Italia) e para o outono prepárase a participación en Liber, Frankfurt e Guadalaxara-México (onde España será Convidada de Honra).
Santiago de Compostela, 25 de xaneiro de 2024.- A Asociación Galega de Editoras afronta de novo a súa presenza nas principais feiras internacionais do libro, de carácter profesional, sen o apoio da Xunta de Galicia. A comezos de abril, nove editoras acudirán —cun espazo propio da AGE integrado no stand da Federación de Gremios de Editoras de España (FGEE)— á Feira Internacional de LIX de Boloña (Italia), a máis importante do mundo en materia de literatura infantil, xuvenil e libro ilustrado. Serán Kalandraka, Xerais, Alvarellos, Bululú, Patas de peixe, Triqueta Verde, Cumio, Galaxia e Creotz Ediciones.
O espazo da AGE en Boloña acollerá nun lugar destacado os libros da autora galega Fina Casalderrey, seleccionada pola Asociación Galega do Libro Infantil e Xuvenil (GALIX) como candidata ao Premio Astrid Lindgren, pois a gañadora ou gañador anunciarase o 9 de abril, no marco da Feira.
LIBER, FRANKFURT E GUADALAXARA
En canto a LIBER, a feira internacional da industria do libro que reúne negocio, contactos profesionais e coñecemento práctico, regresará a Barcelona do 1 ao 3 de outubro de 2024. A Asociación Galega de Editoras vai participar nesta cita sectorial cun stand propio co apoio de CEDRO, ao igual que na Feira Internacional do Libro de Frankfurt, do 16 ao 20 de outubro.
A presenza internacional das editoras galegas en 2024 culminará en Guadalaxara (México), do 30 de novembro ao 8 de decembro, con España como Convidada de Honra. A Asociación Galega de Editoras está a preparar un programa de actividades profesionais que incluirá a proxección dunha peza audiovisual actualizada coas autoras distinguidas recentemente nos Premios Nacionais do Ministerio de Cultura —Yolanda Castaño e Paula Carballeira en Poesía e Literatura Dramática, respectivamente— e impulsará a organización dun acto da rede Galeusca de editoras, coa presenza dos gremios galego, vasco, catalán e valenciano.
UNHA DÉCADA SEN AVANCES
Transcorreu xa máis dunha década sen chegar a un acordo coa Xunta de Galicia sobre a participación das editoras galegas nestas feiras profesionais, pois a Consellería de Cultura considera que o stand debe ser un espazo promocional, fronte ao carácter estritamente profesional que defende a AGE. Así sucede en todos os demais gremios e territorios do Estado e no caso de países como Francia, Suíza ou Polonia, entre outros, nos que as empresas editoras contan con respaldo institucional.
