A AGE acudirá, de novo, á LIBER cun stand propio e coa participación de nove editoras
- O 13/07/2023
- Por segundo ano consecutivo, e ante a falta de acordo coa Xunta de Galicia, a Asociación Galega de Editoras estará presente na feira profesional LIBER cos seus propios medios e coa axuda de CEDRO
- Madrid acolle a 41ª edición da feira internacional do libro, LIBER, do 4 ao 6 de outubro
Santiago de Compostela, 13 de xullo de 2023.- Madrid acolle a celebración da 41ª edición de LIBER, Feira Internacional do Libro, organizada por IFEMA MADRID e promovida pola Federación de Gremios de Editores de España –FGEE-, do 4 ao 6 de outubro no Recinto Feiral de IFEMA. Con máis de catro décadas de traxectoria, a destacada presenza das empresas editoras líderes consolidou esta feira como a primeira mostra dedicada ao libro en castelán, e como principal centro de negocio e intercambio profesional do sector.
Por segundo ano consecutivo, e ante a falta de acordo coa Xunta de Galicia, a Asociación Galega de Editoras estará presente en outubro na feira profesional LIBER cos seus propios medios e coa axuda de CEDRO. As editoras galegas Xerais, Oqueleo, Alvarellos Editora, Kalandraka, Bululú, Hércules de Ediciones, Triqueta Verde, Edicións do Cumio e Creotz Ediciones confirmaron a súa presenza e desenvolverán a axenda e misión comercial dentro do stand da AGE.
No tocante ás participacións agrupadas, ademais da Asociación Galega de Editoras, participarán cunha potente representación: o Gremi d’Editors de Catalunya, a Asociación de Editores de Madrid, o Gremio de Editores de Euskadi, a Asociación de Editores de Andalucía, a Associació d’Editorials do País Valenciá e o Gremio de Editores de Castela e León, entre outras.
En pleno proceso de comercialización as expectativas de participación para LIBER 2023 son excelentes e todo apunta a que a feira vai ofrecer a máis ampla panorámica da produción editorial actual. Ata a data confirmaron a súa presenza más de 250 empresas en 160 stands, cifras que xa sitúan esta edición por riba da representación total acadada en 2021, última celebrada en Madrid.
