INTENSA ACTIVIDADE DA AGE, CON DOCE EDITORAS PRESENTES, NA FEIRA DE FRANKFURT
- O 14/10/2022
- A Asociación Galega de Editoras contará cun espazo propio dentro do stand da Federación de Gremios de Editores de España.
- A AGE elaborou o catálogo “Galician Books”, específico para esta Feira, cunha selección de 90 títulos das doce editoras presentes, e o audiovisual “Unha edición poderosa” onde se recollen os máis de 20 Premios Nacionais galegos en todos os xéneros dos últimos 40 anos.
- O seu presidente, Henrique Alvarellos, participará o xoves nunha mesa redonda sobre a edición nas outras linguas oficiais do Estado -galego, catalán e éuscaro-, e manterá o sábado un encontro co Premio Nacional de Narrativa, Xesús Fraga.
- Así mesmo, a editorial Galaxia, xunto coa Deputación de Pontevedra, presentará o xoves a Escola de Letras, pioneira en Galicia.
- A maior feira profesional do libro do mundo comeza o 19 e remata o 23 e este ano ten a España como cultura convidada.
Santiago de Compostela, 14 de outubro de 2022.- A Asociación Galega de Editoras participa na Feira Internacional do Libro de Frankfurt, a máis importante do mundo, que se celebrará nesta cidade alemá a vindeira semana, entre o 19 e o 23 de outubro, e que este ano terá a España como cultura convidada. A Asociación Galega de Editoras participará cun espazo propio dentro do stand da Federación de Gremios de Editores de España, coa colaboración de CEDRO, no que doce editoriais desenvolverán un intenso programa de actividades profesionais: Alvarellos Editora, Baía Edicións, Kalandraka, Galaxia, Hércules de Ediciones, Xerais, Positivas, Laiovento, Triqueta Verde, Edicións do Cumio, Ediciones del Viento, e a distribuidora Arnoia.
A AGE elaborou o catálogo “Galician Books”, específico para esta Feira, cunha selección de 90 títulos das doce editoras presentes, e o audiovisual “Unha edición poderosa” onde se recollen os máis de 20 Premios Nacionais galegos en todos os xéneros dos últimos 40 anos.
ACTIVIDADES PROFESIONAIS A ASOCIACIÓN GALEGA DE EDITORAS EN FRANKFURT
Editar en catalán, éuscaro e galego
20 de outubro, ás 11:00 (Pavillón 4.1, stand D4)
Coorganizada pola Associació d’Editors en Llengua Catalana, a Associació d’Editorials del País Valencià, Euskal Editoreen Elkartea (Asociación de Editores en Lingua Vasca), o Gremio de Editores de Euskadi, e a Asociación Galega de Editoras, celebrarase a mesa Editar en catalán, éuscaro e galego, para poñer en valor a edición nas demais linguas do Estado. Participarán Joan Abellà (presidente da AELC, e Enciclopèdia Group), Henrique Alvarellos Casas (presidente da AGE ), Carmen Elvira Balsalobre (presidenta do gremio vasco, Pamiela editorial), Àfrica Ramírez Olmos (presidenta do gremio de editores valenciano, directora de Balandra Edition); moderada por Laura R. Herrera (Hércules de Ediciones)
O 22 de outubro, ás 10:00, no pavillón 4.1, stand D4, habilitado para actividades profesionais da Federación de Gremios de Editores de España, o presidente da Asociación Galega de Editoras, Henrique Alvarellos, manterá unha conversa co autor galego Xesús Fraga, cuxo último libro, Virtudes (e Misterios), editado pola Editorial Galaxia, gañou en 2021 o Premio Nacional do Libro de Narrativa.
«UNHA EDICIÓN PODEROSA», LEMA DO VÍDEO PROMOCIONAL QUE A ASOCIACIÓN GALEGA DE EDITORAS LEVARÁ A FRANKFURT
«Unha edición poderosa» é o lema do vídeo promocional que a Asociación Galega de Editoras preparou para a Feira Internacional do Libro de Frankfurt, a cargo da produtora Illa Bufarda.
O audiovisual reúne os máis de vinte «Premios Nacionales» da literatura galega logrados nas últimas décadas en todos os xéneros, galardóns concedidos anualmente polo Ministerio de Cultura de España, e que demostran a enorme calidade creativa e editorial de Galicia.
Concibido como unha homenaxe ao Libro, en só noventa segundos aparecen, nesta creación, dende as últimas persoas premiadas ata as máis veteranas. Un recoñecemento continuo, dende a década dos 80, ao sistema literario e editorial galego.
ISMAEL RAMOS, PREMIO NACIONAL DE POESÍA JOVEN MIGUEL HERNÁNDEZ, SÚMASE AOS DEZ PREMIOS DOS ÚLTIMOS SETE ANOS
Ismael Ramos, galardoado este mesmo mes co Premio Nacional de Poesía Joven Miguel Hernández, súmase aos dez premios dos últimos sete anos que participaron no audiovisual da AGE para Frankfurt: Xesús Fraga (Narrativa, 2021), Olga Novo (Poesía, 2020), Alba Cid (Poesía Joven Miguel Hernández, 2020), Xavier Senín (Obra de Tradutor, 2020), Pilar Pallarés (Poesía, 2019), Anxo Quintela (Xornalismo Cultural, 2019), Ana Romaní (Xornalismo Cultural, 2018), María Xesús Lama (Ensaio, 2018), Antonio García Teijeiro (Literatura Infantil e Xuvenil-, 2017) ou Ledicia Costas (Literatura Infantil e Xuvenil, 2015).
VOCES CONSAGRADAS DAS NOSAS LETRAS
Xunto a eles, voces xa consagradas das nosas Letras: Manuel Rivas (Narrativa, 1996), Suso de Toro (Narrativa, 2003), Alfredo Conde (Narrativa, 1986), Justo Beramendi (Ensaio, 2008), Paco Martín (LIX, 1986), Fina Casalderrey (LIX, 1996), Manuel Lourenzo (Literatura Dramática, 1997), Miguelanxo Prado (Cómic, 2013), Editorial Kalandraka (Mellor Labor Editorial, 2012), Óscar Villán (Ilustración, 1999), Federico Fernández (Ilustración, 2001), María Alonso Seisdedos (Tradución, 2014) ou Andrés Torres Queiruga e José Fernández Lago (Tradución, 1990).
Así mesmo, lémbrase a tres premiados xa falecidos: Agustín Fernández Paz (LIX, 2008), Xabier P. Docampo (LIX, 1994) e Manuel Álvarez Torneiro (Poesía, 2014).
«A MELLOR EDICIÓN PARA UNHA LITERATURA DE PREMIO»
«As nosas letras son enormes —afírmase no audiovisual—. Proxéctanse con Premios Nacionales de Literatura en todas as categorías. Temos a mellor edición para unha literatura de premio. Unha edición poderosa».
A EDITORIAL GALAXIA ORGANIZOU UNHA ACTIVIDADE ARREDOR DA ESCOLA DE LETRAS
A Escola de Letras, impulsada pola Deputación de Pontevedra e a Editorial Galaxia, pioneira en Galicia e unha das poucas existentes no Estado, será presentada ao sector e aos medios alemáns o xoves 20 de outubro, ás 10:00, no stand D4 da Federación de Gremios de Editores de España. No encontro participarán o director xeral de Galaxia, Francisco Castro, a escritora Inma López Silva, e a presidenta da Deputación de Pontevedra, Carmela Silva.
